Histoire de Gembloux

L’istwêre di Djiblou è deûs mots quate paroles...
 

Djiblou, c’èst d’dja one vîye vîye vile. Si vos spèlichoz s’ nom, vos vièroz qu’èlle ègzisteûve dèdja, à l’aparence, do timps dès Cèltes.
On-z-a d’ayeûrs ritrové on moncia d’ cayèts (objets) do timps dès Gaulwès èt dès Romins tot-au d’dilong dè l’ tchaussîye rominne Bavay – Cologne, tchaussîye qui passe pa Djiblou, do costé do nôrd.
Maîsse vôye po lès sôdârds èt lès botiquîs, lès prumêrès cinses s’ont v’nu bâti dins s’ vijnauve (à proximité)
Tot va por on mia. On s’ètind bin avou lès Romins.… mins ça n’ va nin durer ostant qu’ lès contribucions !
Lès Romins n’ sont pus si vayauves (vaillants, zélés), gn-a one craye ou deûs qui s’ laît aler à l’ limodje di leû empîre èt au trwèsyin.me siéke, gn-a l’ batch qui r’toûne su l’ pourcia ! On-z-atrape lès Djèrmwins su nosse dos. Dès waradjes (sauvages), vos-ôtes !
Si sauvadjes qui, èvôye, nos djins, s’aler catchî bin lon èri dèl tchaussîye ! C’è-st-insi qui l’ tiène au mitan dèl vile a stî ocupé, là qu’on pout co veûy nos vîyès pîres au djoû d’audjoûrdu.
En 1935, quand on-z-a cauvelé po bâti dès novias batumints po l’ Faculté des Sciences Agronomiques, on-z-a r’trové one fosse do sètyin.me siéke.
Au dîjyin.me siéke, on chèvalier lomé Wicbertus a faît skèpyî l’abîye di Djiblou, tot lî d’nant di sès têres da li. C’è-st-en onze cint èt dîj qu’il a div’nu sint Guibêrt.
One ritchèsse di tos lès diâles – si dj’ pou dîre ça insi – qu’ ç’a stî po Djiblou, cite abîye là, au onzyin.me siéke.
Li mwin.ne Olbêrt, li, il a faît fé one èglîje èt on covint.
Au dozyin.me siéke, là co todi l’ vièrna qui r’toûne !
Qui dj’ vos dîye : Djiblou èsteûve dins l’ duché d’ Brèbant mins al limodje do comté d’ Nameur. Et i s’ faît qu’ cès deûs là èstin’ todi à igne èt agne. Todi en margayes, mès-omes ! Po l’ mwins’ trwès côps qu’ lès sôdârds do comte di Nameur ont ataqué Djibou. Ça n’ fieûve nin lès-afaîres di nos djins, ça !
En onze cint cinquante trwès, li cité a r’çû l’ pêrmission d’ bâti dès wôts meurs po s’ garanti conte lès mauriv’nants. Dès meurs d’aviè on kulomète di long po mète au r’cwè sèt’ bounîs d’ têre (gn-aveûve dèdja trwès da l’abîye). Dès meurs avou quate pwates, saquants toûrs èt on fossé tot-autoû.
Co d’chance qu’en quatôze cint èt trinte, li duc di Bourgogne, Philippe le Bon, a rachoné lès difèrints payis (régions) d’ nosse têre (pays) po n’è fé pus qu’onk èt ramwinrner, do min.me côp, one miète di paujêreté è nosse vile.
Mins bèrwète, ça n’ dure nin ! Dins l’ deûsyin.me mitan do sêzyin.me siéke, vo-nos-la co todi avou l’ guêre su nosse capotine. Lès guêres di r’lijion, asteûre ! Et, en quinze cint sèptante yût’, li guêre ètur lès Gueux èt lès sôdârds èspagnols avou Djan d’Autriche à leû tièsse (Djan d’Autriche qu’èsteut l’ fi bastaud d’ Châles, li cinquyin.me do nom)
Di ç’ timps là, li cia qu’a tot à dîre su nosse vile, c’èst l’abé. C’èst li qui lome li mayeûr èt lès scabins por on an. Et co lès rèvoyî si ça lî stitche.
I mwinrneûve l’atèléye à Djiblou, mins èto à Ernadje, Mani, Bèrtinchamps, one pârtîye di Lonzéye, Sauvnêre èt Lirou qui fyin’ pârtîye di Djiblou. Djiblou n’ s’a jamaîs seû fé quite di s’-t-abé. Rin à fé, c’èst li qu’èst maîsse.
Au dîs-sètyin.me siéke, on n’èst nin co foû do pènin. C’èst Louis XIV ci côp ci qui nos cache misére. Et come si ça n’âreut nin co stî âssez, c’èst l’ feu, après, qui ravadje nosse cité.
Il a falu ratinde li mitan do dîj-yûtyin.me siéke po qu’ Djiblou si ryeûche one miète qui vâye. C’è-st-à ç’ momint là qu’ gn-a yeû lès prumîs coutelîs. Djiblou qu’èsteut fwârt avant (surtout) on viladje di cinsîs a div’nu one miète industriél èto.
L’abîye èt l’èglîje div’nin’ one miète trop vîyes. On l’s-a r’bâti, timps dès-abés Ujène Gérard èt Djâque Legrain, li qu’a uké li bin conu ârchitèke Lorint-Bènwèt Dewez. Lès travaus ont stî tot faîts en dîs sèt’ cint sèptante noûf... Çu qui vout dîre qui lès mwin.nes n’ont nén yeû l’ crédit di d’mèrer longtimps dins leûs novias meurs. Li Révolucion francèse a r’vièssé lès gros bonèts, lès monseûs, lès tchèsturlins èt lès curés avou. Pupont d’ comté d’ Djiblou ! Djiblou, ci n’èst pus qu’one comune do dèpârtèmint d’ Sambe èt Moûse. C’èst lès Francès qu’âront fé rèche Djiblou foû do roman payis d’ Brèbant. L’abîye a stî r’vindeuwe en 1797.
Au mwès d’ sètimbe dîj yût cint èt trinte, saquants Djibloutîs s’ont stî bate po l’ libèrté d’ nosse payis.
En dîj yût cint cinquante cinq, Djiblou èst r’loyîye pa li tch’min d’ fiêr à Brussèle èt l’anéye d’après, à Nameur.
C’è-st-en dîj yût cint swèssante qui l’Institut agricole de l’Etat a vèyu l’ djoû dins lès batumints d’ l’abîye. C’èst l’ prumî d’ nôvimbe di ç’te anéye là qu’on-z-a c’mincî a d’né dès lèçons. Au prumî d’ janvier dîj yût cint swèssante-y-onk, il èstin’ à trinte sèt’ ètudiants. Après trwès-anéyes d’ètudes, i plin’ awè leû diplome d’injénieûr agricole.
S’on-z-a tchwèsi Djiblou po mète one sifaîte sicole, c’èst pace qu’èlle èst bin mèteuwe dins on-arincrin d’ vôyes èt d’ vôyes di tch’min d’ fiêr. C’èst pace qui Djiblou è-st-au plin mitan d’ bounès têres di culture. C’èst pace qu’i gn-aveûve one masse di place dins lès batumints d’ l’abîye. C’èst pace qu’on-z-aveûve tot ç’ qu’i faleûve dizo mwin po studî... èt c’èst pace qui l’ minisse Châle Rogier, Maurice Ledocte dè l’ Société agricole et industrielle et Françwès-Djôsèf Pièton, sénateûr èt prôpiètaîre di l’abîye s’ètindin’ come cu èt tch’mîje...
En dîj yût cint quatrè-vint onk, l’Etat rachetéye tos lès batumints dè l’ vîye abîye, sauf li cinse. L’Institut agricole a faît place à l’ Faculté universitaire des sciences agronomiques. C’èst véla qui l’ doze di nôvimbe dîj noûf cint èt sêze, lès sôdârds alemands ont rèlî tos lès-omes do canton d’ Djiblou po l’s-èvoyî dins lès-ûsines en Alemagne. Sêze cints qu’il ont stî à d’vu sûre ci vôye là !
Djiblou a co payî fwârt tchêr lès-anéyes dèl guêre di quarante.
Li quatôze èt l’ quinze di maîy en quarante, ça stî l’ fameûse bataye di Djiblou. Li prumêre division marokinne èt l’ quinzyin.me division d’infanterie motorisée ont t’nu tièsse deûs djoûs au long au 16ème Panzer Korps alemand.
Au prumî d’ janvier dîj noûf cint swèssante cinq, Djiblou a r’pris pa d’zo sès pènas lès viladjes d’Ernadje, Mani, Lonzéye èt Sauvnêre èt au prumî d’ janvier dîj noûf cint sèptante sèt’ (A.R. do 17 di sètimbe 1975), Djiblou a co ragrandi avou lès viladjes di Beûzèt (avou l’amia d’ Fèrôz), Bossêre (avou lès amias di Golzène èt Vichenèt), Bôtè, Côrwè, Grand Lé (avou si-t-amia di P’tit Lé), In.ne èt Li Mazi. On l’ lome adon : Djiblou su Ôrnia.
Dispû ç’ djoû là, li populâcion a crèchu come dès-aubwissons (champignons). Nin à cause do candjemint di s’ nom, nin qu’à Djiblou on djon.netéye dipus qu’ôte paut mins tot simplumint pace qu’à Djiblou, on-z-î a totes sès-ayèsses po-z-aler èt v’nu èwou qu’on vout, qui ç’ fuche en-auto oubin avou l’ trin.
Li lwè do trinte di julèt’ 1979 a r’candjî li nom di Djiblou-su-Ôrnia en Djiblou.
Li lwè do 5 di jun 1998 a pèrmètu qui l’ Comune di Djiblou pwate asteûre li nom di : vile di Djiblou.
L’aflidje di Djiblou :
Trwès clés d’ârdjint su do nwêr avou one courone di comte à trêze pièles au d’dizeû d’ tot ça.
Li courone di pièles vout dîre qui Djiblou a stî on comté à dater do sêzyin.me siéke. C’è-st-à paurti di ç’ momint là qui l’ grand maîsse di l’abîye, Bénédicte di Djiblou a bin p’lu pwarter l’ tite d’abé-comte.
L’abé, c’èst li qu’aveûve tot à dîre à Djiblou, dispû qu’one chârte aveut stî sinée en 946 pa Otton I èt r’mèteuwe à Guibert (Wicbertus) qu’aveut faît bâti l’abîye.
Mins ç’ papî là a stî one miète traficoté pa Sigebert (1030 – 1112). Nosse Sijebêrt a faît qu’il èsteut d’né brâmint d’pus d’ libèrtés qui po d’ bon (en réalité). Quétefîye min.me qu’il âreûve mètu one fausse date pace qui, po dès syincieûs qu’i gn-a (certains chercheurs), l’abîye n’a stî bâtîye qu’en 983.
On n’ sét rin d’ôte su noste aflidje. On-z-a longtimps sondjî qu’ lès trwès clés èstin’ lès cènes po douviè lès pwates dèl vile. Mins gn-aveûve quate di pwates au dozyin.me siéke ! Li pwate Al crwès (al copète dèl Grand Reuwe), li pwate au Nwêr Tchén (au crwèsemint dèl reuwe do min.me nom avou l’ reuwe Docq èt l’ reuwe Sinte Adéle), li Pwate au Trau ou Pwate Sint Nicolès ou co Pwate dèl Valéye (au coron dèl reuwe Léopold pad’vant l’ reuwe Théo Toussaint) èt l’ pwate Wérimolin (reuwe Notrè Dame, pad’vant l’ place di L’Orneau).
Adon, quand on pinse aus clés dès pwates qu’i gn-aveûve dins lès vîs meurs dèl vile, dandjureû qu’on-z-èst foû vôye.
Dins l’éclôse dèl Faculté, gn-a dès vitraus qui r’présintenut lès-aflidjes di 35 abés. Su l’ cène di l’abé Arnould di Tchausse (1268 - 1300), gn-a trwès clés d’ârdjint. Est ç’ qui ça vêreûve di d’la ?
Au djoû d’audjoûrdu, on n’a co pont d’ rèsponse à ça.